Gerediaga

Gerediaga ha realizado una investigacion sobre la Feria de San Blas

Gerediaga — 2012-01-31

“Sanblasak begietan” izenarekin Gerediaga Elkarteak Abadiñoko azokari buruzko liburu berria egin du Udalaren enkarguz eta Kutxabankaren laguntzarekin. Argazki bidez eta beren beregi libururako egin den ikerketaren bidez, urteetan San Blas azokak izan duen bilakaera erakusteko helburua izan du liburuak.

Lorea Madina kazetaria eta Txelu Angoitia argazkilaria izan dira liburuaren egileak.

Zati nabarmen bi ditu: batetik, argazkiak. 1915. urtetik 2011ra arteko San Blasak iruditan erakusten dira. Bestetik, San Blas azoka eta jaiak izan duen bilakaerari buruzko ikerketa jaso da.

40 argazkilariren 125 argazki inguru ikusi daitezke. Argazkilarien artean denetarik dago: profesionalak, izendunak edota azken urteetan Udalak antolatu izan dituen lehiaketetan parte hartutakoak. Argazkien bitartez San Blas azokaren “bizitza” irudikatu daiteke. Horien lagungarri, zortzi abadiñarrek San Blas azokari eta jaiari buruz duten akorduak idatziz tartekatu dituzte.

Lorea Madina kazetariak, bestetik, Gerediaga Elkartearen dokumentazio zentruan ezezik, Abadiñoko Udalaren artxioetan eta beste hainbat lekutan, laupabost hilabeteko ikerketa lana burutu du. Horrez gain, 60ko hamarkadan azoka biziberritzeko Gerediaga Elkartearekin batera, hainbat erakundek eta herritarrek egin zuten ahaleginaren berri, zuzeneko lekukoak elkarrizketatuz jaso ditu. Bi hizkuntzatan San Blas azokaren jatorria eta bilakaera argitzeko ikerketa jaso du.

Recordamos a Antonio Tovar en el Dia de la Merindad

Gerediaga — 2011-12-30

Euskara hizkuntza izan zuen ardatza aurtengo Merinalde Egunak abenduaren 27an. Urtero moduan, Gerediagako ermitan ekitaldia antolatu zuen Gerediaga Elkarteak. 1875. urtean, abenduaren 27an, Durangaldeko elizateetako alkateak Gerediagako gune foralean azken aldiz batu zirela gogoratzen du horrela urtero. Urtebete beranduago, uztailaren 22an, Foruak kendu egin zituzten eta eskualdeko erakundeak desagertu. Merinalde Egunarekin, Durangaldearen lurraldetasuna eta izan zituen berezko erakundeak gogoratzen dira.

Abenduaren 27an, arratsaldeko 19:00etan Gerediagako ermitan izan zen aurtengo ekitaldia. Euskara hizkuntza ardatz hartuta, Antonio Tovar filologo, hizkuntzalari eta euskarazalea gogoratzeko ekitaldia izan zen, bere jaioatzaren mendeurrena bete zenean.

Antonio Tovar Valladoliden jaio zen, baina bere aita Elorrioko notarioa izan zen eta 11 urtera arte Elorrion bizi izan zen. Gero, Elorrion ikerlari euskara hizkuntza ikertzen ere urte batzuk egin zituen. 1980An, Durangoko Euskal Liburu eta Disko Azokan ere parte hartu zuen. Madriletik etorrita, Durangoko udaletxeko aretoan Azokako sarrera hitzaldia eman zuen. Fray Juan de Zumarraga durangarraren euskarazko idatzien ganean jardun zuen besteak beste.

Antonio Tovar gogoratzearekin batera, Merinalde Eguneko ekitaldian Iñaki Gaminde hizkuntzalariak ere parte hartu zuen. Durango Merinaldeko euskararen ezaugarri eta berezitasunei buruz hitzegin zuen. Gamindek Bizkaiko hainbat herritako euskara ikertzen lan handia egin du azken urteetan.

ARGAZKIA FOTO SOL-ek UTZITAKOA: Durangoko udaletxeko aretoan, 198ko abenduaren 8an, Durangoko Euskal Liburu eta Disko Azokaren sarrera hitzaldia. Argazkian, Jose Luis Lizundia, Antonio Tovar, Patxi Zubikarai (Durangoko alkatea) eta Sabin Goikolea (Gerediagako presidentea)

El Ayuntamiento de Abadiño premio a Gerediaga

Gerediaga — 2011-12-18

Joan den ostiralean, abenduaren 16an, Abadiñoko Udalak Abadiño Sariak banatu zituen. Saridunen artean, Gerediaga Elkarteak Ibilbide Saria jaso zuen. Ekitaldia, Errota Kultur Elkartean egin zen, iluntzeko 20:00etan.

Beste sarituak honako hauek izan ziren: Eneritz Iturriagaetxebarria txirrindulariak Nazioarteko arrakastarako Abadiño Saria jaso zuen; Gorakada antzerki-taldeak Urteko arrakastarako Abadiño Saria jaso zuen; Edurne Astigarragak Isileko lanari emandako saria hartu zuen, eta, azkenik, Mila Salterainek Sari berezia jaso zuen.

Ha merecido el esfuerzo

Gerediaga — 2011-12-08

Gerediaga Elkarteko behargin eta bazkide batzuek azken hilabeteetan egin duten lanak emaitza onak izan ditu. 46. Durangoko Euskal Liburu eta Disko Azokako eskaintzari jendeak ondo erantzun dio. Kultur elkarte eta erakunde batzuekin hasitako elkarlanak, beste batzuekin estututakoak, erakundeetatik jasotako babesak eta Durangaldeko zein kanpoko enpresa pribatu batzuek aurkeztu diegun proiektuarekin bat egin izanak, 46. edizio borobila egin dute.

Abenduaren 4tik 8ra arteko egunak, ekintzak, argazkiak, bideoak, albisteak.... www.durangokoazoka.com webgunean dituzue.

Gerediaga comparte el Premio Lauaxeta con su gente y sus colaboradores

Gerediaga — 2011-12-02

Bizkaiko Foru Aldundiak Lauaxeta Saria eman dio Gerediaga Elkarteari, joan den 46 urteetan egindako lana eskertzeko. Foru Jauregian egin den ekitaldian, Gerediaga Elkarteko bazkide eta ezagun ugari batu dira. Nerea Mujika presidenteak urte guzti hauetan bazkideek egin duten lana eskertu eta azpimarratu du.

Hona hemen Nerea Mujikaren berbak

Hauxe Gerediagari buruz Lauaxeta Sarietarako egin den ikus-entzunezkoa

VII Premio Lauaxeta para Gerediaga Elkartea

Gerediaga — 2011-11-17

Bizkaiko Foru Aldundiak aurtengo Lauaxeta Saria Gerediaga Elkarteari eman dio. Bizkaia euskara sustatu, zabalu eta normalizatzeko ahaleginagatik emandako ohorezko sari sinbolikoa da. Saria emateko ekitaldia abenduaren 1ean, goizeko 11:00etan, egingo da Foru Jauregian eta Jose Luis Bilbao Aldun Nagusiak emango du.

Gerediaga Elkarteak hainbat arlotan egindakoa nabarmendu dute Bizkaiko Foru Aldunditik: " Durangaldeko ondare historiko, artistiko eta dokumentala berreskuratzea; folklore-adierazpenak mantentzea; eskualdearen iragana ikertzea; eta ikerketa-lan berriak sustatzea, Durangaldea ezagutaraziz eta tokiko erakundeei aholkularitza eskainiz.

Bizkaimedia atarian argitaratu du Bizkaiko Foru Aldundiak albistea.

En venta el calendario 2012

Gerediaga — 2011-11-12

Gerediaga Elkarteak Durangoko Amankomunazgoaren laguntzarekin urtero argitaratzen duen egutegia salgai dago. Durangaldeko liburudenda nagusietan egongo da Durangaldea 2012 Egutegia. Gero, Durangoko Azokan elkarteak jarriko duen stand berezian ere erosi ahal izango da. Prezioa: 5€

Ohiturari eutsiz, Durangaldeko argazki zaharrek apaintzen dute egutegia. 13 argazki zahar dira. Elkartearen artxibokoak batzuk, beste artxiboetatik ekarritakoak, edota bazkideek zein Durangaldeko norbanakoek utzitakoak.

Egutegiaren azaleko argazkia Harripausueta inguruan ataratakoa da eta Ricardo Doliwa artxiboko argazkia da.

ASTOLA: 5 años, 5 revistas, 50 trabajos, 840 paginas

Gerediaga — 2011-10-28

Gerediaga Elkarteak Astola aldizkariaren 5. zenbakia argitaratu du. 2007. urtean, urtekari formatuarekin, Durangaldeari buruzko ikerketak eta azterlanak argitaratu eta sutatzeko helburuarekin sortu zen. 2011. urtean argitaratutakoak helburu berdinarekin, 175 orritan 10 ikerketa plazaratzen ditu.

Aurreko urteetako salneurria mantenduko da. Bost eurotan, Durangaldeko liburudenda nagusietan salgai izango da (azaroaren erdialdean) eta Gerediaga Elkarteak Durangoko Azokan izango duen gune berezian ere eskuratu ahal izango da.

Honek labur-labur Astola aldizkariaren 5. zenbakiko ikerketak:

Askondoko Zaldiak (Egileak: Diego Garate eta Joseba Rios)

Urkuleta auzoko Askondo kobazuloan Goi Paleolitiko garaiko margoak aurkitu dituzten arkeologoek aurkikuntzaren garrantzia azaltzen dute.

Durangoko Emakumeen Kartzela (Egilea: Maria Gonzalez Gorosarri)

Durango 1936 Kultur Elkarteko lehendakariak emakumeek kartzeletan bizi zuten egoeraren kontakizuna egin du, Nevers eskoletan izan zen Durangoko kartzelan izan ziren emakumeen lekukotzak aintzat hartuz.

Arria Erreka (Egilea: Maite Ibañez)

Oizen jaiotzen den errekaren aprobetxamendu hidraulikoa handia izan da urteetan: errotak, burdinolak, zentral hidroelektrikoak... Berrizko erreka honetan zehar ibilbidea egiteko proposamena da ikerketa.

Durangaldea 2027 (Egileak: Kimetz Munitxa, Hodei Zenikaonandia eta Dani Maeztu)

Uztailaren 26an behin-betiko onartu zen Durangoko Eskualde Egituraren Lurraldearekiko Zati-Egitamua. Zer den eta zer eragin duen azaltzeaz gain, egileek eskualdeari ekarri liezaiokenaren ikuspuntua plazaratu dute.

Durango, geltoki Nagusia (Egilea: Jose Mari Uriarte)

1882an hasita Durango trenbideen lotunea izan da: Durango-Zumarraga, Bilbo-Durango tranbia eta Durango-Elorrio zein Arrazolako meategietara zihoan trena. Trenbideen korapiloa ulertzeko ikerketa da honakoa.

Bolbora Usaina (Egilea: Karlos Eriz)

Elorriar gehienek ondo ezagutzen duten usaina da. Urriaren lehenengo igandean egiten den jaia gogoratzen dute. Lan honetan, barru barrutik jaia ezagutzeko aukera dago, errebonbilloen eskutik.

Ondarearen zalantzako etorkizuna (Egilea: Jon Irazabal)

Urteetan egin den lanari esker, ondare aberatsa daukagu eskualdean. Baina utzikeriak edo momentuko agintarien arduragabekeriak altxor asko galtzea ekarri du. Gaur egun ere kezkagarria da batzuen egoera.

Zuzenbide zibila Durangaldean (Egilea: Gontzal Aizpurua)

Eskualdean ditugun zuzenbide zibil ezberdin bien azterketa egin du abokatuak. Herritarron bizitzan ezberdintasun horrek duen eragina, zergatik gertatzen den edota, non eta nori aplikatzen zaion azaltzen du.

Elorrioko petrolioa (Egilea: Lorea Madina)

1919. urtean Elorrion petrolio-prospekzioak egiten hasi ziren. Belgika, Alemania, Alsazia eta Errusiako behargin eta teknikariak urre beltza bilatzen zuten horretarako sortu zen Goikotxea Alzuaran enpresaren agindupean.

Atxondo: hirurak bat (Egilea: Oihane Buruaga de Sancha)

2012ko uztailaren 5ean 50 urte beteko dira Axpe, Apatamonasterio eta Arrazola eleizateak batu eta Atxondo udalerria sortu zela. Batzeko arrazoiak zeintzuk izan ziren argitzen ditu artikulu honek.

La asociacion recibira DEIA Hemendik Saria

Gerediaga — 2011-10-21

Gerediaga Elkarteak Kultur arloko DEIA Hemendik Saria jasoko du. Laugarren urtez Deia egunkariak eskualdeka banatzen ditu sari hauek eta Durangaldeari dagokionez, kultur arloko saria Gerediaga Elkarteari emango diote. Horren harira, gaur, erreportajea argitaratu dute Deian.

Saria jasotzeko ekitaldia azaroaren 26an egingo da Zornotza Aretoan, arratsaldeko 20:00etan.

La cultura gallega sera la invitada de Durangoko Azoka

Gerediaga — 2011-10-03

Gaur 46. Durangoko Euskal Liburu eta Disko Azoka iragarriko duen kartela aurkeztu dugu eta horrekin batera, galegoa abenduaren 4tik 8ra kultura gonbidatua izango dela ere nabarmendu dugu.

Culturgal Elkartearekin elkarlanean osatuko dugu kultura galegoa gurean ezagutzera emateko programa. Euskal sortzaileak eta galegoak elkarrekin jardungo dute Azokan. Egitarau zehatza, azaroaren erdialdera, aurkezpen nagusian zabalduko dugu.

Bestetik, aurtengo Azoka iragarriko duen kartela Cristobal Aguiló murtziarrarena da. 28 lanetatik aukeratu du epaimahaiak irabazle. Binilozko diskoa oinarri hartuta irakurtzen dabilen gizakia irudikatu du. Lehiaketara aurkeztu diren lanak Durangoko Azokaren webgunean ikusi daitezke.

Ocasion para conocer el Duranguesado en la ilustracion en el mes de octubre

Gerediaga — 2011-09-28

Bigarren urtez jarraian, Gerediaga Elkarteak eta Urkiola Landa Garapenak, Durangaldean Bizkaia mailan egiten diren Ondarearen Europako Jardunaldietarako, eskualdeko egitarau amankomuna bideratu dute, ekimenean parte hartzen duten zortzi udalen laguntza eta elkarlanarekin.

Ekitaldi mota diferenteen bidez, herrietako ondarea eta historia ezagutzera emateko ekimena da. Bisita antzeztuak, tailerrak, kontzertuak, erakusketak, ... adin guztietara zuzendutako ekintzak dira. Aurten, “argiak eta aurrerapena” leloarekin, ilustrazio garaia ezagutzeko modua izango da 16 ekitalditan. Ektialdi gehienak doakoak dira, baina izena eman behar da aurrez jende kopuru mugatua dutelako.

Berriz, Durango, Elorrio, Garai, Iurreta, Mañaria, Otxandio eta Zaldibar izango dira ekitaldiak prestatu dituzten herriak. Ekimenean, aurten, lehenengoz, Berrizek eta Zaldibarrek parte hartuko dute. Egitarau osoa webgune honean ikusi daiteke.

La bandera de Iurreta cumple 100 años

Gerediaga — 2011-09-26

Iurreta elizateko banderak 100 urte betetzen ditu irailaren 27an. Banderaren historia eta herritarrentzako duen esanahi batzen dituen liburuxka, dokumentala eta erakusketa antolatu dituzte.

Herri batzordea sortu da bereziki banderaren 100. urteurrena ospatzeko. Udalaren bandera berritu egin da eta 100 urte betetzen direnean erakutsiko da. Horretarako, arratsaldeko 20:00etan ekitaldia egingo da udaletxean. Bandera berritua erakutsiko da. "Herri bat, bandera bat" dokumentala ere ikusi hala izango dabe. DVDarekin batera, liburuxka bat ere argitaratu da. Eta urriaren 2ra arte, udaletxeko pleno aretoan erakusketa bat ere zabalik egongo da banderaren historia ezagutzeko.

Durangoko Azoka en la red

Gerediaga — 2011-09-20

Durangoko Azokari buruzko informazioa, www.durangokoazoka.com webgunean ezeze, @durangokoazoka twitter kontuan eta www.facebook.com/DurangokoAzoka sare sozialean jarraitu daiteke. Azoka egunetarako, flickr eta youtube kontuak ere egokituko ditugu.

Gerediaga Elkartean abenduaren 4tik 8ra 46. Durangoko Euskal Liburu eta Disko Azoka prestatzen bete-betean gabiltza. Dagoeneko parte hartu nahi dutenentzat izena-emateko epea zabaldu dugu. Irailaren 30era arte dute aukera. Aste honetan, bestetik, Ahotsenean parte hartzeko epea zabaldu da. Euskarazko sortzaileentzat bereziki hirugarren urtez prestatuko den gunea da.

Jose Urien y su perro "Bizkai" campeon de Euskal Herria

Gerediaga — 2011-09-19

Axpen (Atxondon) 45. Euskal Herriko Artzain Txakur Txapelketa, Gerediaga Elkarteak antolatuta eta I. Durangaldeko Ardi Jaiaren egitarauaren barruan. Abadiñoko Jose Urien artzainak eta “Bizkai” bere txakurrak irabazi dute txapelketa . Lehenengoz parte hartzen du txakurrak txapelketetan eta joan den asteburuan Bizkaikoa eta gaur Euskal Herrikoa irabazi ditu.

Eguraldiak lagundu ez badu ere, Durangaldeko Ardi Jaiaren azken eguneko ekitaldietara jendea hurreratu da. Txapelketa ezeze, mendi ibilbidea, tailerrak eta labeldun oilaskoa zein ardo dastaketa egiteko aukera izan dute hurreratu direnek.

Txapelketako sailkapena honako izan da:

Txapelduna : “Bizkai” txakurra – Jose Urien (Abadiño-Bizkaia) - 344 pt
“Ttiki” – Antonio Alustiza (Areso-Nafarroa) – 316 pt
“Txiko” – Marzel Hualde (Aldude-Iparralde) – 299 pt
“Aske” – Jon Zuazo (Nafarrete – Araba) – 149 pt
“Gure “ – Jesus Mº Plazaola (Arrasate – Gipuzkoa) – 140 pt
“Leze” – Jose Mª Jauregi (Ilarduia – Araba) – 134pt
“Azkar” – Juan Jose Arrizabalaga ( Elgoibar – Gipuzkoa) – 126pt
“Riki” – Enrique Mendiguren (Orozko – Bizkaia) – 122pt
“Eki” – Gilles Etxegoien (Donamartiri – Iparralde) – 93pt
“Bat” – Antonio Alustiza (Areso – Nafarroa) – 87 pt
“Abil” – Roger Jauretxea (Baigorri – Iparraldea)

Euskal artzain arraza onenaren saria “Leze” txakurrak eskuratu du (Jose Mari Jauregi, Ilarduiako artzainaren txakurra)

Mas de 20 actos en la Durangaldeko Ardi Jaia

Gerediaga — 2011-09-13

Gerediaga Elkarteak, + Dendak eta ACOL elkarteekin batera, Durangaldeko Ardi Jaia antolatu dugu lehenengoz irailaren 16tik 18ra. Durango, Abadiño eta Atxondon 20 ekitaldi baino gehiago antolatu ditugu: lehiaketak, dastaketak, tailerrak, azokak... Egitaraua webgune honetan kontsultatu daiteke.

Argazkian, Durangaldeko Ardi Jaiaren aurkezpenean parte hartu duten hiru elkarteetako ordezkariak: Gillermo Oarbeaskoa, Sabin Aranburua, Lazaro Milikua eta Jose Antonio Azkorbebeitia.

Abierto el plazo para las inscripciones en la Durangoko Azoka

Gerediaga — 2011-09-09

Abenduaren 4tik 8ra egingo da 46. Durangoko Euskal Liburu eta Disko Azoka, Gerediaga Elkarteak antolatuta. Irailaren 1etik 30era parte hartzeko interesa duten argitaletxe, diskoetxe, elkarte eta erakundeek eskaria egin dezakete. Horretarako informazioa Durangoko Azokaren webgunean eskuratu daiteke.

Ha fallecido el euskaltzale otxandiarra Bittor Kapanaga

Gerediaga — 2011-07-15

86 urte daukazala zendu da Otxandion Bittor Kapanaga euskaltzalea, idazlea eta Gerediaga Elkarteko kidea. Arratsaldeko 19:00etan Otxandioko Santa Marina parrokian hileta elizkizunak egingo dituzte gaur.

Bittor Kapanaga Elorza, 1925. urtean jaio zen Otxandion. Gerediaga Elkarteko kide eta Otxandion kultur ekintza askoren sustatzaile: antzerki emanaldiak, hitzaldiak, jaiak, lehiaketak... 1997an Gerediaga Elkarteak herri ohiturak batzen, herri kulturgintza sustatzen eta euskararen alde egindako lana eskertzeko Argizaiola saria eman zion.

Bittor Kapanagaren biografia laburra Euskal Idazleen Elkarteko webgunetik jaso dugu.

16 grupos participaran en el Ezpatadantzari Eguna del sabado en Garai

Gerediaga — 2011-07-05

Larunbatean, uztailaren 9an, Garain Durangaldeko Ezpatadantzari Eguna ospatuko da. Honakoa 39. edizioa izango da eta guztira, 16 ezpatadantzari taldek parte hartuko dute.

Jaia arratsaldekoa izango da. 18:30ean kalejira egingo dute eta ostean, dantza saioa. Gero afaria eta erromeria izango dituzte herriko frontoian.

Durangaldeko 8 herritatik etorritako ezpatadantzariak izango dira Garain.Guztira, baina, 128 ezpadantzari 16 taldetan banatuta. Taldeetako txistulari eta laguntzaileak kontuan hartuta 200 lagunetik gora batuko da aurtengo Ezpatadantzari Egunean.

Honek dira talde partehartzaileak:

Abadiño - 2 (Talde Batuak 1 / Iluntze 1)
Berriz - 4 (San Lorentzo 1 / Iremiñe 3)
Durango - 1 (Txoritxu Alai)
Garai - 2
Iurreta - 4
Izurtza - 1
Mañaria - 1
Otxandio - 1

Ezpatadantzari Eguneko historia laburra irakurgai duzu webgune honetan.

Homenaje a la Comunidad de Urkiola

Gerediaga — 2011-06-06

Gerediaga Elkarteak Urkiolako komunitateari eskerrona agertzeko ekitaldia antolatu du ekainaren 12rako, San Antonio egunaren bezperan, Urkiolako Santutegian, eguerdiko 13:00etan. Urteetan, misiolariak ezezik Urkiola zaintzen, mantentzen, zuzpertzen borondatez ibili diren lagunek egindako lana eskertzeko omenaldia izango da.

70eko hamarkadan gainbeheran zegoen ingurua berreskuratzen hasitako lanak gaur egun Euskal Herriko paraje ikusgarrienetako bat bihurtu du Urkiola ingurua. Erdigunea Santutegia izanda, bere inguruan borondatez lanean ibili izan den eta oraindik dabilen lan-taldeak denetarik egin du: jai antolaketan, baso garbitzen, elizkizunak prestatzen, bisitariei harrera egiten...Jende askoren esfortzua eta borondatezko lana dago Urkiola moduko parajearen atzean. Durangaldeko lekurik esanguratsuena zaintzen eta mantentzen egindako lan hori eskertzeko ekitaldia izango da Gerediagak antolatutakoa.

Ekainaren 12an, eguerdiko13:00etan egingo da Urkiola Santutegian. Durangoko Orfeoiak, Kriskitin Dantza Taldeak eta Abadiñoko Talde Batuak parte hartuko dute ekitaldian. Besteak beste, urteetan egin den lanaren erakusgarri argazki-proiekzioa prestatu du Gerediaga Elkarteak.

200 dantzaris del Duranguesado se reuniran en DANTZAROA

Gerediaga — 2011-05-30

Hirugarren urtez jarraian egingo da Dantzaroa Gerediaga Elkartearen ekimenez eta Durangaldeko dantza taldeen partehartzearekin. Aurtengo ekitaldia Durangoko Euskal Astearen barruan egingo da, ekainaren 4ean, Ezkurdi plazan.

10 dantza taldetako dantzariak, neskak eta mutilak, izango dira. Guztira 200 dantzarik eta musikarik parte hartuko dut Dantzaroan: Izurtza, Mañaria, Matiena, Abadiño, Garai, Iurreta, Berriz eta Durangoko taldeak .

Dantzaroa kalejira batekin hasiko dute. Arratsaldeko 19:00etan Durangoko udaletxe aurrean batuko dira eta gero Goienkaletik kalejiran Ezkurdi plazaraino joango dira. 19:30ean egingo da dantzen erakustaldia: mutilek banangoa, makiljokoa eta txotxongiloa dantzatuko dute. Gero, neskekin batera, zinta dantza, estanpa eta arku dantza egingo dira. Eta amaitzeko neska-mutilek elkarrekin aurreskua egingo dute.

Dantzarora girotzekot, amaieran, kalitatea fundazioaren eskutik, oilasko errea dastatzeko aukera izango da.

Durangaldeko folklorea plazaratzeko zita

Durangaldea eskualde dantzaria da. Baina gure folklorearen adierazle nagusi diren dantzak oraindik ere ezezagunak dira askorentzat. Horrek plazaratu eta ezagutzera emateko urteroko hitzordua izateko jaio zen Dantzaroa ekimena.